सिरहामा एसईई परीक्षाको समाचार संकलनमा रोक

सिरहा । जारी मध्यमिक शिक्षा परीक्षा (एसईई) को समाचार संकलन गर्न सिरहामा संचारकर्मीहरुलाई रोक लगाईएको घटनाप्रति नेपाल पत्रकार महासंघको ध्यानाकर्षण भएको छ ।

बिहीबार पहिलो दिन संचालन भएको परीक्षाको समाचार संकलन गर्न पुगेका संचारकर्मीहरुलाई जिल्लाका बिभिन्न परीक्षा केन्द्रहरुमा रोक लगाईएको नेपाल पत्रकार महासंघ सिरहा शाखाले जारी गरेको बिज्ञप्तीमा उल्लेख छ ।

बिज्ञप्तीमा भनिएको छ ‘परीक्षाका क्रममा संस्थागत बिद्यालय सञ्चालकबाट स्थानीय प्रहरी, प्रशासन, जिल्ला शिक्षा कार्यालयका कर्मचारीहरु तथा केन्द्राध्यक्षलाई प्रभाव पारी परीक्षा अमर्यादित बनाएको बिगतको अनुभब ताजै छ ।’

एसईई परीक्षामा संचारकर्मीहरुलाई समाचार संकलनमा रोक लगाएर परीक्षा अमर्यादीत भएको बुझ्न सकिने पत्रकार महासंघ सिरहा शाखाका अध्यक्ष दिनेश्वर गुप्ताले जारी गरेको बिज्ञप्तीमा उल्लेख छ ।